بلكونة

احم احم النهاردة اخر يوم فى 2009 خلاص سنة عدت من عمرى

بمرها وحلوهااللى غطى على مرها كان عندى احلام وبدات فعلا احققها احلام كده (…………….)

واحلام كده (………….)

اعز اصحاب عندى اتجوزو ايمان وهبة وسهير اصحاب ابتدائى باه

وبرضو زى مكنت متوقعه مش بشوفهم غير صدف لكن الحمد لله

هما مبسوطين بحياتهم الجديدة ويارب يفضلو مبسوطين كده على طول

مش عارفه اتكلم عن 2009 بس اقدر اقول ان دى اكتر سنة ضحكت فيها

من قلبى اخت فيها شوية حرية ضغنتتين كده لقيت فيها اصحاب جدعان بجد

وفرحانة انى بقيت اجتماعيه اكتر من الاول يعنى بسال عليهم لما بيغيبو

او بيساللوعليا لو غبت حتى لو كان الموضوع كله فى كومينت على البلوجر

او ان بوكس اول ول على الفيس بوك مش مهم المهم انى بقيت فرحانه وخلاص

وكمان فرحانه علشان قابلت ناس كنت بتمنى اشوفهم بس مش نقعد مع بعض ونرغى كمان بالساعات

وفرحانة ان ماما بقيت تسمعنى اكتر من الاول وتعرف ان مش مهمتى فى الدنيا انى اتجوز واربى عيال وخلاص

لا بنت عندها احلام ممكن تحققها ومبسوطه شوية من بابا انه عرف اخيرا انى

بعرف اتناقش مع اللى قدامى وانى كبرت مش بنت صغيرةيتخاف عليها

وحبيت اخويا احمد اوى مع انه لسه بيحب تامر حسنى والحزب الوطنى وهيشلنى بكلمة

ان الريس البلد دى بتاعته وهو حر باه يديها لابنه ياجرها وانا مال اهلى مايعمل فيها اللى

هو عايزة بس برضو فرحت اننا قربنا من بعض اكتر عن السنين اللى فاتت وبقينا بخرج ونسافر مع بعض

وبقيت انا وهو عندنا شوية خصوصيه كده دة كفاية انه عارف ان عندى اكونتين على الفيس بوك واحد

للتفتيش والتانى خاص بيا وكمان باه بيحترم خصوصياتى اكتر من الاول بكتير عايزة اقوله احمد انا بحبك اوى

امنياتى باه فى 2010

يارب يحمى الناس اللى بحبهم وافضل احب الناس كلها ومحدش يزعل منى خالص

وانى افضل زى ما انا ايمان (…………………..)وكده مش لازم اقول يعنى



ونفسى اطمن على ادرينالين القط بتاعى اللى بابا سربة من ورايا

واخر حاجة يارب يارب نفسى فى بلكونة فى اوضتى بدل ما بنط كل يوم من الشباك وانزل للبلكونه


وبقيت فضحتشى بجلاجل فى الشااارع

اهئ اهئ المفروض كنت انزل البوست ده يوم
31\12\2009

احمر شفايف

الحكاية دى حصالتلى من شهرين تقريبا بس مش عارفه ليه افتكرتها دلوقت
صحيت الصبح قلت اروح اتمشى واجيب الجرايد بالمرة يعنى بدرى كده قبل الزحمه
بس كان يوم حر اوى قلت اعدى على الصيدليه اللى على اول الشارع بتاعى اجيب كلنيكس علشان الشمس هتعمل عمايلها معايا
وبعد الصباح على كريمه وكده
لقيت ست زى القمر فى الصيدليه بتسال على احمر شفايف
فستغربت من الكلمه فضحكتلى انا وكريمه وقالت ايوة احمر شفاسف روج يعنى او جلاس بس وحشانى الكلمه يا بنات
وضحكت ضحكه صافيه من قلبها
قالت عارفين مجرد كلمه احمر شفايف بتحسسنى انى لسه بنت ستاشر سنه
مش يعنى 40 سنه خالص وعليهم شوية سنين
واختارت لون احمر فاقع كمان ودفعت حسابه ومشيت
وانا جبت المناديل ومشيت
ولما رجعت البيت وقفت قدام المريا وبصيت لنفسى اوى ودورت على روج احمر فاقع عند ماما قديم
لما لقيته افتكرت نفسى زمان لما كنت بقعد الخبط بيه وشى وماما تقولى بطل يابت انتى صغيرة على الكلام ده
اقولها مليش دعوة عايزة اكبر بقى وافك الفيونكات بتاعت شعرى واقولها اعمليلى شعرى زيك ياماما كانت بتحضنى اوى وتقولى
بكرة لما تجيبى بنوته زى القمر هتقوللها نفس كلامى ليكى دلوقت
مش عارفه حاسه انى عايزة احضن ماما اوى
وقولها كلام كتير اوى
اقولها انى نفسى ارجع تانى صغيرة
وادور على احمر الشفايف بتاعك
والخبط بيه وشى
وافك فيونكات شعرى
واقولك عايزة اكبر يا ماما
وتحضنينى اوى

توابع هلوستى

الساعة دلوقت 3 ونص ولسة برضوا مش عارفه انام ومفيش حاجة اعملها
مش سامعه اى صوت صمت رهيب بس صوت عقارب الساعة هيجننى
هجرب افتح ال ام بى ثرى على اى اغنية ياه خسارة البطارية فاضيت
طيب الراديو برضوا البطاريه خلاص ايه الكسل اللى انا فيه ده كل مرة انسى اجيب بطاريات
خلاص استنى كدة وادى بطارية الراديو عضعضت فيها شوية وحطيطها
مكنها تانى ايوة كدة اشتغل بقلب فى المحطات اية اغنية فيروز
مرسال المراسيل تحفه جايه فى معدها بس مش عارفه ايه خلانى اقفل الراديو قبل ما الاغنية تخلص
اجرب كدة افتح الشباك اتفرج على السما باليل بس انا كنت بشوف ديما تلات نجوم بس مش موجودين ليه النهاردة
هقفل الشباك وافتح النور واقفل عليا الاوضة كويسببص تحت السرير جرايد كتير اوى هو انا
محتفظه بيهم لية مع انى حفظاهم ورقه ورقه وخبر خبر وحاجات تانية كتير جنبى
ملهاش اى لازمه ورق مقطع على كراريس على بطاريات فاضية على اقلام مفيهاش حبر
وكمان جنبى رواية بقالها سنتين مش عارفه اخلصها مع انى خلصت رويات وكتب كتير ليه هيه بالذت
مع ان اسمها حلو اوى خرائط للموج عزة رشاد ديما اوصل لحد الجزء الحادى عشر
وارجع لها من الاول تانى
جاى فى دماغى دلوقت اسمع اغنية انسان لبلاك تيما بس ياخسارة البطارية فضيت
خلاص هغنيها مع نفسى الكوبليه اللى بحبه
انا زحمه وربكه وشغل جنان نصى بيضحك والتانى زعلان
طيب هو نصى التانى زعلان لية
اووووف اتخنقت من الاوضة دى حيطانها عماله تضيق عليا كل يوم ياريتنى
ماسيبت اوضتى القديمه يااااه كان كل ركن فيها مليان كتابة على الحيطان بتاعتها
كاتبة كل ذكرى حلوة عشتها بالتاريخ واليوم ورسمت قلوب كتير وشخبط اكتر
وكنت كاتبة كل اصحاب صحابى بتوع زمان اللى معرفش مين فينا ساب التانى انا ولا هما
مش عارفه مالى اليومين دول عماله اهلوس كده بس المشكله مش انى نقلت للاوضه دى
لا انا سبت اوضتى القديمة بقالى اكتر من سنه لما بابا قرر انى لازم امسح كل الكتابة والشخبطه اللى على
الحيطان بتاعت اوضتى ياااااااااااااااااه كنت حاسة انى بمسمح حياتى كلها
ومن يومها مقدرتش اقعد فيها تانى حاسة ان الحيطان بقيت غريبة عنى متعرفنيش
وجيت الوضه دى حاسة برضوا بغربة زهقت منها حاولت كتير علشان اخد عليها
بلاقى نفسى كل يوم ادخل اوضتى القديمه وقف قدام الحيطان وافضل ابص يمكن الاقى اى كلمه او شخبطة تفكرنى
تانى عايزة ارجع كل الكتابة والشخبطة بس ياخسارة مش عارفه بقيت زى الزمن لما بيعدى
عمره ما بيرجع تانى خلاص
وفى كل مرة بقول لنفسى مفكرش كده واحاول اعمل ذكريات جديدة بس المرة دى
مكتبهاش على حيطان اوضة لا اكتبيها فى قلبك علشان مفيش حد فى الدنيا دى كلها يقدر
يمسحالك فى يوم بس يا ترى هيبقى عندى ذكريات حلوة زى اللى راحت منى ولا لا
انا عارفه ان مفيش حد هيقدر يرد على سؤالى دة غير الزمن هو بس اللى عنده الاجابة
وعندى ديما سؤال اساله لنفسى من يومها ومش لاقيه ليه اجابة لحد دلوقت
هو ليه لما اتمسحت ذكرياتى وشخبطى من على الحيطة
بقيت حاسة بغربة جوايا؟

اصلك هتوحشينى

قابلت ايمان صاحبتى او بمعنى اصح انتمتى معايا من ابتدائى لحد ثانوى
نفس الفصل والدسك قابلتها صدفه زى كل مرةوعرفت منها انها كانت
جيالى علشان تعزمنى على فرحها الخميس الجاى على قد ما فرحت اوى
على قد مزعلت وبقولها يعنى خلاص هتتجوزى ومش اشوفك زى الاول تانى
ردت عليا واخدتنى فى حضنها اوى وقالتلى ايوة خلاص
وبعدين سابتنى ومشيت كان نفسى انادي عليها تانى واخدها فى حضنى اوى
واقولها انها كانت وحشانى وهتوحشنى اكتر بكتيييييييييييير وانها لما تتجوز هينقص حته منى
خلاص مش هيبقالى بعدها حد اكتر واحده حبتها فى الدنيا دى كلها
اصل بعد ثانوى مبقناش نشوف بعض غير مناسابات او صدف وبس يمكن متكونش حاسه انى بحبها اوى كدة
لاكن نفسى فى يوم فرحها احضنها اوى وقولها بحبك موت وواوعى تنسينى
مش عارفه هستحمل ازاى لما اشوفها وهيه ماشيه
ياااااااه الفراق ده صعب اوى ربنا يسعدها ويحلى كل ايامها
بس بقول لنفسى ماهيه كانت قدامك مكنتيش بتسالى عليها وتروحلها زى الاول ليه
هو انا زباله اوى كده انا اسفه بجد متزعليش منى عمرى ماهنسى ايامنا سوى ايام ابتدائى
لما كنا بنتخانق مين فينا يقعد جنب الحيطة علشان يشخبط عليها براحته
وايام اعدادى فريق الجمباز والمرشدات ولا حتى ايام ثانوى واستاذ وائل اللى كان مطلع عينا
وكبناله بيبسى على الكرسى بتاعه وفضحته كانت بجلاجل وكنا هنترفد لولا ستر ربنا
ولعب الكورة والمظاهرات والدروس والصحيان بدرى واكلنا سوى فى الفسحه وجرينا وربعض وكانتين عم
حمودة اللى ياما زوغنا فيه وشككنا من عنده
ومحاولات الانتحار اللى كنا اول منتخنق من حاجة نقعد نفكر ونفنن ننتحر ازاى
وبعدها نفضل نضحك من قلبنا على خيبتنا
ياه هتوحشنى رزلت وانتى بتصحينى من النوم للمدرسة وقولك وطى صوتك
بابا نايم وهيقوم يطين عشتنا احنا الاتنين وزيطردنا برة البيت
وتقوللى خلاص يخربيتك يلا البوابه هتقفل وقولك مبلاش نروح واتصل بمماتك وانك هتفضلى معايا نذاكر سوى طول النهار
واول ما بابا ينزل نشغل ا غانى ونكتبها علشان نسمعها لبعض
هيوحشنى شريط انا اكتر واحد بيحبك لعمرو دياب
اللى حفظناه سوى فى 3 ساعات
هيوحشنى كل لما اعدى من قدام بيتك وانا دى عليكى با اعلى صوتى يا منه وانتى تردى عليا متطلعى يا بت
هتوحشنى ضحكتك وهتوحشنى ايمان اللى برتاح لما اسمع صوتها فى التليفون
وهية بتقولى يخربيتك انتى لسه هنا انا مستنياكى من الصبح وانا ارد عليكى واقولك يا نهاااااار
هو انا يا بنتى قلتلك انا جيالك اصلا تردى عليا على طول
وتقوليلى اصلك وحشتينى
ايمان انا اللى بقولهالك دلوقت لما تتجوزى هتسيبى فراغ جويا كبيييييييير
ومكنتش حاسة بيه وانتى معايا اصلك هتوحشينى

هلوسة

امبارح كانت عندى هبه صاحبتى كانت عصبية جدا وبسالها مالك قالتلى ان فى واحدة صحبتنا عملت معاها حركة نداله
ولو شافتها ممكن تقتلها فسالتها على طول هو انتى ممكن تقتليها بجد جوبتنى بسرعة ايوة طبعا فبصراحه استغربت جدا
ازاى قالتلى اللى ياخد حاجة منى ممكن اقتله وسالتنى نفس السؤال هو انتى عمرك فكرتى تقتلى حد جوبتها طبعا علطول
لا طبعا فقالتلى اكيد انتى بتهزرى وهسيبك تفكرنى مع نفسك وابقى قوليلى بكرة
لما مشيت سالت نفسى نفس السوال هو انا فى يوم ممكن افكرن انى اقتل حد حتى لو الحد دة اخد منى كل حاجة
وازاى هيجيلى قلب واموت بنى ادم طيب لو مش بنى ادم ممكن اقتل ايه فكرت اقتل الخوف جوايا والملل والشعور بالوحدة حتى وانا
وسط الناس يااااه احساس مخيف ان الواحد يفكر حتى يقتل حاجة جواه حتى لو مش حلوة يعنى لو قتلت الخوف جوايا مش هيكون عندى
احساس اما الملل هفضل مشغوله ديما هفقد قدرتى فى الاستمتاع بحاجات كتير اما الوحده ياااه مقدرش وحدتى دى جزء منى بحبها بتونسنى
وانا لوحدى لما اكون مخنوقه وعايزة افضفض مش بلاقى غير نفسى هيه اللى بتسمعنى اية اللخبطة اللى انا فيها دى واية خلانى اكتب
الكلام ده هنا مش عارفه يمكن علشان خايفه من بكره ملقيش عندى ذكريات لالا انا كده بقيت مجنونة رسمى طيب هبص فى المريا يمكن
مكنش انا ازاى اتغيرت يالهوى هو انا وصل بيا الحال انى افكر فى القتل
ينهار انا عمرى ما فكرت ااذى حد وربنا يعلم قد ايه بستكتر عليا الفرحه وقول لنفسى انا فرحانه وفيه ناس فى اللحظه دى محرومين من
الضحكه دى وليه لما بفرح اوى بعيط يمكن علشان الفرح بقى كتير عليا واخاف يجى يوم معرفش اضحك من قلبى تانى
يااااااه انا حاسه انى تهت والسط الزحمه وسط الكلام شخبط كتير ورسمت اكتر على جدران بيتنا وفى الاخر الزمن مسحلى كل حاجة
ياه هو الواحد عجز على كده طيب منير وحشنى هجرب كده اغنى سرقت عمرى من احزانى سرقته لاكن ما جانى
حتى لما بغنى لمنير جوايا حزن ليه اكتر جمله جايه على بالى دلوقت لمنير ياحزن ليه ساكن ملامحى وبقيت اكنك حته منى
انا تعبت من التفكير ومن الكتابه عايزة اصرخ اااااااااااااااااااااااااااااااه
طيب هو انا ممكن انتحر؟
21\3\2009

ايوة انا زملكاويييييية فيها حاجة دى

ايوة انا زملاكاوية وللابد

يعنى مش عايزة اتكلم كتير وكفاية بقى النكت اللى ا ختها من امبارح لحد

دلوقت منك لله يافلفيو ادعى عليك باية يعنى جبت الجون فى اخر عشر دقايق

ويسلام بقى بعد الماتش الناس عملوا مظاهرة حب للاهلى

بجد اتمنيت بتوع الامن المركزى يكونوا موجودين ساعتها

ويحسوبوا ان دى مظهرة ضد الحزب الوطنى

يلا هعمل اية يعنى هفضل احب برضوا الزمااااااااااالك

صباحكو فل يا عرب

ورجعت تانى يااااااااه الايام اللى فاتت كانت عاملة زى الكابوس

مكنتش متخيلة انها هتعدى لاكن الحمد لله اتعلمت منها درس بجد

عرفت قيمة الناس والصحاب اللى بجد واللى فشنك

لاكن ما علينا منى خالص دلوقت

عندى بقى كلمتين فى زرورى محشورين فى موضوع غزة دة

وهموت لو مقلتهمش لية كل اللى بيحصل فى غزة دة

اية الوحشية والمجازر والدمار والخراب دة كله

لية احنا كا عرب مش قادرين نعمل ليهم حاجة

,ولية العرب بالذات اللى بيتمسح بكرامتهم الارض بالشكل دة

ودمنا بقى رخيص قوى مش عند العالم كله وبس لا وفى بلدنا كمان

وفين بقى المؤتمرات والشعارات والشكليات اللى دوشنا بيها ليل معا نهار من

وزراء ومسؤلين وحكام دولولازى منه

اية اسرائيل خلاص مفيش حد قادر عليها ولا قادرين نرد او حتى نقول كفاية

حتى احنا فى عز اللى غزة فية مش قادرين نمنع الغاز

عن اسرائيل والتطبيع بقى عينى عينك كدة

ومحدش بقى يقولى بكرة هنعمل حاجة ومش عارفة اية

والكلام اللى لا يودى ولا يجيب دة احنا مش هنقدر نعمل حاجة طول

ما احنا مش قادرين نرفع وشنا من الارض من كتر الكسوف

والخيبة اللى بقينا فيهم

ويسلام بقى على الناس اللى شايفة كل اللى بيحصل

وحاسين انهم بيتفرجوا على فيلم ويعيطلهم شويتين وخلاص

والفيلم يخلص ويستنوا العرض القادم زى اية ار تى سينما كدة

انا عارفة كويس ان كلامى لا هيودى ولا هيجيب بسكنت هنفجر من كتر اللى بيحصل

اه كنت هنسى اى حد هيقرا الكلام دة مينساش يقرا الفا تحة للضابط

ياسر اللى احنا كلنا عارفين استشهد ازاى

وسلام

تاج تانى احمدك يارب

جالى تاج من عبد الله انسان جميل اوى

وكتر خير انه بجد لسة فية عندة عقل من الثانوية العامية

ندخل بقى على التاج واستر يارب

اعملى كباية شاى كدة و اسمع شبابيك

استعنا على الشقا بالله

*هل سبق ان فكرت فى افعال مجنونة؟

ينهااااااااار كتييييييييييييييير اوى لية بس كدة يا عبد الله

*هل نفذت احد هذة الافعال ؟

بصراحة اه هيه صحيح بتعك عليا فى الاخر بس ببقى مبسوطة انى عملتها

*هل علم بها احد؟وما ردفعلة عليها ؟

اكيد طبعا اصحابى بس بستغرب لية بيقولوا عليا مجنونة طيب ميعملوا زى وريحونى احسن

*ما هو احساسك بعد ان قمت بهذة الافعال المجنونة ؟

ههههههههههههههههههههههه ببقى فرحانة اوى ويسلام لو كان مقلب جامد عملته فى حد

بس بشرط ميضروش ببقى فى قمت سعاتى وحريتى

*هل ندمتعلى فعل جنونى كاد ان يودى بحياتك ؟

لا يا عم اعذو بالله ندم اية بس ممكن اه فاكرة انى مرة قعدت فى وسط الشارع

وكان فى عربية هتلزقنى فى الرصيف بس عدت على خير والحمد لله

* هل سبقت ووقفت امام المراة لتقول لنفسك انك مجنون ؟

ينهاااااااااااااار كتيييييييييييييييير اوى اوى

*يا ترى هتبعت التاج دة لمين ؟

اه جاتلى الفرصة طبعا اسامة امين صاحب مدونة(شمو نشادر)

اول تاج

اول مرة فى حياتى يجيلى تاج
ومش عارفة هجاوب ازاى التاج دة جالى من
اسامة امين حد جميل اوى بتعجبنى تعلقاتة موت

اسمع بقى معاه سيد درويش شد الحزام
علشان اعرف اجاوب
خليك معانا يارب
السؤال الاول
أذكر خمس أحلام على الاقل .. تخص ماضيك وتحلم فيها بتغيير اشياء .. ماذا ستعدل وماذا ستترك ؟
كان نفسى زمان ابقى مدرسة علشان اضرب

العيال زى عندنا فى المدرسة كدة اى حد يعمل

حاجة كان بياخدهم

وكمان كان نفسى ابقى راقصة بالية

كنت باحس انهم بيبقى طايرين وهما بيرقصوا واشتركت فعلا بس خلاص بقى كله راح

وكان نفسى امثل اصلى كنت بموت فى سعاد حسنى اوى و و كان عندى احلام كتير اوى

بس كفاية كدة

السؤال التانى
.. اذكر خمس أحلام على الأقل تخص مستقبلك ؟

بحلم ابقى ربنا يخلصنى من الوش اللى انا فية

وابقى انسانة تعرف حاجات كتير عن الدنيا

والناس تشوفنى زى ما انا عايزة وبحلم ربنا يخليلى بابا وماما

وياريت يعرفوا انى كبرت بقى

ونفسى اعيش لحد ميجى رئيس تانى غير حسنى او ابنة

وطبعا فية احلام كتير بس بلاش اصلها مجنونة

السؤال التالت

.. أذكر شخصين على الأقل متواجدين فى حياتك حاليا .. كنت تود وجودهم قبل الآن بزمن ..

بصراحة هو فية كتير مش عارفة اقول مين ولا مين ومعرفش اعدهم بقى

بس على فكرة الصحاب دول بتوع الفيس بوك والمدونات

السؤال الرابع أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..
نفسى تيتة كانت تبقى موجودة الله يرحمها كانت امى بجد

وتقريبا كنت بحبها اكتر من امى

وكان نفسى كمان فى ميس حنان مدرسة الرسم بتاعت الابتدائى

بس الظروف بقى مبقناش نشوف بعض

السؤال الخامس

تهدى التاج لمين ؟؟

هههههههههههههههههههههه

اخيرا الاسئلة خلصت اهديه لبيرو عاشقة القمر وكيكى وعبد الله وشادى اصلان

وكان نفسى اهدية لا اسامة ودعاء موجات

بس التاجات الجاية بقى سلام

ياريت مكنش تقلت عليكوا

وعقبال كدة مجاوب على تاج عبد الله

الكبير كبير

اخيراالبوم منير نزل يا الف ليلة بيضا بجد مش

مصدقه اخيرا بعد 3 سنينبس انا زعلت اوى

لما الالبوم اتسرب كامل على النت وتعب ناس 3

سنين يضيع فى مجرد كوبى من على موقع

كانوا بس يستنوا شوية لاكن اقول اية فى ناس

بتحب تتضيع فرحة اى حد

بس الالبوم دة جامد جيييييييدا وكل اغنية فية

تنفع تتعمل البوم لوحدها من كلمات والحان

وطبعا صوت الملك واللى انا متاكدة منه اوى

ان منير مكنش بيغنى بصوته وبس لا دة بروحه واحساسه

اغانى لما تسمعها تحس انك طاير لفوق اوى

ومن الاخر كدة الكبير كبير يا محمد يامنير

لوح ازاز مشبر

بجد ضربة شمس المرة دى جامدة جيدا بس اكتر حاجة عجابتنى فيها مسرحية

الجميل والمبدع مخلوف

لوح ازاز مشبر تسلم يا مخلوف

الفصل الأول:
يضيء المسرح علي فتاة في العشرين من عمرها تجلس علي المسرح علي كرسي صغير ترتدي فستانًا أحمر ذا قماش لامع، تجلس خلف منضدة مثبت علي حافتها لوح زجاجي يفصلها عن الجمهور.
(يمكن عمل برواز لهذا الزجاج أو وضعه كشباك).. أمامها علي المنضدة بعض الإكسسوارات: مناديل.. أدوات مكياچ.. عروسة صغيرة.. كراسة صغيرة.
يدخل من يمين المسرح ولد في العشرينيات متوسط الطول يرتدي قميصًا قماشًا أبيض وبنطلونًا كتانًا واسعًا.. شعره ناعم غير منظم، يمر أمام الفتاة.. ينظر لها ثم يرجع.. تنتبه الفتاة له وتنظر، ثم تنهض بجسمها وهي مازالت جالسة كأنها ترحب به أو تشجعه علي التقدم.
يقف أمامها متأملاً البرواز الزجاجي.. تتابعة بنظرها.. يرفع الولد كفه ويهم بالحديث، ولكنه يتراجع، تخفض رأسها وتصاب بالإحباط بعض الشيء.. يحزن الولد.
يتحرك الولد بخطوات بطيئة أمام لوح الزجاج ويعبث في أطراف قميصه مفكرًا كيف يبدأ.. وهي تتابعه بنظرها.. ينظر إليها.. فتبتسم له وتومئ برأسها مشجعة.. يقترب من الزجاج.. فتقترب.. ولا يجرؤ علي التحدث مرة أخري!
تجلس محبطة تمامًا ممسكة عروسة في يدها.. يجري الولد إلي يسار المسرح يلتقط وردة من الكواليس ويتركها لها علي حافة البرواز الزجاجي ويرحل.. تنظر إلي الوردة وتتحسس بأصابعها الزجاج ولا تستطيع أن تأخذ الوردة.
(إظلام)
الفصل الثاني:
نفس البنت.. جالسة خلف لوحها الزجاجي ولكنها نائمة علي المنضدة.. يدخل من يمين المسرح شاب في العشرينيات أيضًا يرتدي تي شيرتًا ضيقًا يبرز أكتافه العريضة وعضلات صدره وبنطلونًا چينز.. و«كوتش» أحمر اللون.
يري الفتاة.. يبتسم ويمشي إليها، ينقر علي الزجاج.. تنظر له.. يبتسم ويلوح لها «هاي» يشير لها متسائلاً «شوفتي عصفور صغير طاير من هنا؟».. تجيب بالإشارة «لأ».
يحزن الولد.. ويشير لها مودعًا «باي» ويمشي ببطء وهي تتابعه بنظرها.. يرجع لها بسرعة، مشيرًا إلي لون فستانها، ومشيرًا إلي لون «الكوتش» الذي يرتديه «نفس اللون» يبتسمان.. يخرج من جيبه كرة حمراء صغيرة ويقوم ببعض الألعاب السحرية البسيطة التي تعتمد علي خفة اليد.
تقف الفتاة علي أطراف أصابعها مثل الأطفال وهي تشاهد عرضه في سعادة، يمسك الكرة ويقذف بها في الهواء فتختفي، ينظر إليها.. فتنظر إليه، يقترب من الزجاج فتقترب.. يضع كفه علي الزجاج، فترفع كفها الصغيرة ببطء وتضعها في مواجهة كفه.. ويحركان يديهما.. كأن كلاً منهما يلامس الآخر.
يقترب بوجهه.. وتقترب بوجهها.. يتحسس بعينه شعرها عبر الزجاج.. خدها.. شفتيها، تخجل.. فيقترب أكثر من الزجاج ويترك عليه زفيره مشكلاً مساحة «مشبرة» لا بأس بما رسم فيها «قلب وفيه سهم».. تبتسم وتقترب حتي تلامس شفتيها الزجاج الشفاف جدًا.. وتترك مساحة صغيرة من الشبورة ترسم فيها بإحساس البنات «وش بيضحك».
يمر من فوقهما عصفور صغير.. مغردًا بصوت رقيق.. تشير هي إليه «ده عصفورك» ينظر للعصفور.. ويمد خطوة للحاق به.. ويشير لها «هاجي بكرة» ويلوح «باي باي» تلوح هي الأخري وتجلس في هدوء وسعادة بالغة.
(إظلام)
الفصل الثالث:
يضيء المسرح علي الفتاة خلف زجاجها جالسة علي كرسيها الصغير واضعة ساقيها علي المنضدة.. وتلعب في خصلات شعرها.
يدخل من يمين المسرح شاب ضخم الجثة، يرتدي قميصًا مفتوح الصدر وبنطلونًا قماشًا وحذاء أسود لامعًا.. يقترب منها وينقر علي زجاجها ويؤكد بيده الأخري علي هندمة ياقة قميصه الكبيرة.
تنظر له مبتسمة، يبتسم ويشير لها «هاي» ترد الإشارة.. «هاي» بينما هو ينظر إلي ساقها النائمة علي المنضدة.. تنتبه.. تنزل ساقها وتنهره بنظرة.
يبتسم ويشير لها (إنتي مزة جدًا).. تبتسم وتريح شعرها الأسود إلي الخلف.. يشير لها «تعالي نخرج سوا».. ترد مشيرة إلي البرواز الزجاجي «إزاي؟».
يشير متوسلاً لها.. تهز كتفها اليسري وتبتسم في خجل.. يخرج من جيبه علبة صغيرة «قطيفة» بها خاتم ذهب ذو فص لامع تقترب بسعادة لتراه.. وتحاول أن تمسكه، ولكن أظافرها المطلية تصطدم بالزجاج.. فتعود محبطة جالسة في مكانها.
يشير لها الولد «إستني»، يشمر عن ساعد عريض يضرب به الزجاج.. فيهشمه.. تضع يدها علي فمها من المفاجأة يقدم لها الخاتم مرة أخري.. تبتسم وتقترب لتأخذه.. يمسكها بعنف ويقبلها.
(إظلام)

وهقول

مش عارفة طقت فى دماغى اكتب الكلام دة

اصلى كنت لسة مخلصة قراية مقال استاذ طارق رضوان

فى الدستور(بالذمة دى بلد دى) بصراحة جات فى الجون

انا عارفة انه كلام عادى وانتوا عارفين ان دى مدونتى بقى وانا حرة

لاكن انا مفروسة موووووووووت من الحكومة دىوعايزة افش كل اللى جوايا فيها

من ساعت العلاوة ال 30 وامداد قانون الطوارئ اه لوسابونى عليها

حكومت بنت(تيييييييييييييت) بس يلا هنفضل اتكلم واقول

هنقول ونقول ونقول

مش هنفضل كدة على طول

لو مهما العمر يطول

لازم فى يوم من الاخر كلامنا هيجيب مفعول

فى حكومة اصلها غول

وقال اية مش عارفة مين فيها المسؤل

والريس ماشى وراها بالظبط زى المسطول

ولا ابنه التانى المهبول اللى نفسه يصبح مسؤل

عمال يكوش ويحوش ويقول علشانكوا بقيت انا المذلول

مش كفاية ابن عز عمال يقش يقش لحد مبقى زيهم غول

لا حاسب يا مستر منك له دى الناس لسه برضوا فيها عقول

وهنشوف مين فى الاخر هيبقى فينا المخبول

مش هنسكت تانى زى زمان وهنفضل وهنفضل كدة على طول

وهنقول ونقول ونقول..................

مش لاقيلها عنوان ينفع

بقالى كام يوم كدة بصحى بدرى اوى يعنى على الساعة

الصبح اخد رواية خرائط للموج (اموووووت واكملها) ا

وmb3 واطلع على السطح عندى اوضة فوق السطوح (نفسى بصراحة اسبلهم البيت واعيش فيها واربيلى قططين كدة)ا

بتاع بتنا واقعد معى نفسى كدة اقرا شوية واسرح شويتن وانا بسمع منير

الجو الصبحية بيبقى تحفة بجد بس امبارح حصل موقف كدة مش ولا بد كانت ابلةايناس جارتنا

واقفه فى البلكونة (مش عارفة هية صاحية بدرى ليية يمكن علشان تنكد على امى)ا

وشافتنى طبعا وبدات بقى الاسئلة من اول انتى صاحية بدرى ليية لحد هططبخوا اية النهاردة

( وفى اليوم دة عملتلهم طاجن بامية) المهم كان نفسى اليوم دة يعدى على خير

بس للاسف فية ناس كدة مبيتبلش فى بقها فولة على طول راحت وقالت لما ما

بنتك اية اللى مصحيها بدرى كدة لييية وى وى وى المهم طبعا ماما مصدقت(اصل بقالها يومين مفروسة منى) ا

وهاتك بقى يا شتية من اللى قلبك يحبها وضرب من ابو وردة(الشبشب طبعا ) ويا ماما مينفعش طيب يا حاجة

ومش عارفها اية ابدا راسها والف سيف تعرف انا صاحية ليةمن بدرى

وبدات افهما ان انا بحاول اطلع الطاقة الاجابية اللى جوايا تقولى بلا طاقة بلا بتنجان مقلى

صحيالى تبعى للبن بس بصراحة ماما عملت معايا الواجب وزيادة حبتين

طلعتلى الطاقة الاجابية والسلبية كمان بس بالشبشب(ابو وردة) ومنهم لله بقى الناس ولا

تيييييييييييييت(ممنوعة رقابيا) ويارب اخلص ام دى رواية احسن انا زهقت منها
ومن ايناس ومن الشارع بحاله

مش اخر مرة

انا عارفة يا بابا ان دى مش اخر مرة تفصلى فيها النت

كل مرة كدة اختلف معاك تعملنى زى العيلة الصغيرة

نفسى مرة تفهمنى وتعرف انى كبرت على معملة الاطفال دى

بس الموضوع دة جه بفايدة برضوا خلصت كام رواية كدة

كنت جيباهم من زمان ومش عارفة اخلصهم خالص

بس تعرف فكرتنى بكلام جومانا حداد

بتقول اية عارف

لا احديحزر ماذا اقول حين اصمت

من ارى حين اغمض عينى

كيف انساق حين انساق

عما ابحث حين اطلق يدى

ولا احد لا احد يعرف

متى اجوع متى اسافر

متى امشى ومتى اضيع

وان ذهابى عودة وعودتى احجام

وان ضعفى قناع وقوتى قناع

والا تى عاصفة

يظنون انهم يعرفون

وانا ادعهم يظنون واحدث

جعلوا لى قفصا كى تكون حريتى هدية منهم

فا اشكر واطيع

لكنى حرة قبلهم بعدهم بهم دونهم

حرة بقهرى بهزيمتى

وسجنى ما اريد

ياريت بقى تفهمنى وتعاملنى كا انسانة

مش كا بنت خايف عليها وخلاص

MADE IN EGYPT

امبارح كنت معى هبة صاحبتى كنا رايحين نشترى لبس

لقيت كل التى شيرتات مكتوب عليها بل ENGLISH

يعنى مثلا ILOVE YOU وMYLOVE وكدة يعنى

واللى فارسنى اكتر بقى انها MADE IN EGYPT

قلت ساعتهاوفيها اية يعنى لما يبقى لبسنا مكتوب علية بالعربى

نعمل لوجو ورسومات بطريقة حلوة تليق بينا كشباب عربى

ولا احنا بس عمالين نقول امريكا لا ونتكلم عن حضارتنا ال7 تلاف سنة

ومش كدة وبس حتى اكتر كلامنا بقى كله تقريبا ENGLISH

نفسى نتمسك بلغتنا اكتر من كدة

وعندى بقى سؤال ممكن حد فينا يقدر يلبس تى شيرت

مكتوب عليةILOVE YOU بس بالعربى؟

ايوة ايوة لسة فية؟

واحد ابن حلال حب ينكد عليا

على الfacebook وبعتلى الصورة دى على لبروفيل بتاعى

وفيها اية يعنى انى زملاكاوية والله اناطلعت لقيت

نفسى زملاكاوية فى بيت اهلاوى متعصب كمان

مش عارفة يمكن علشان اكون مختلفة عنهم فى حاجة

بس بيصعب علية اوى الزمالك حرام وربنا الاهلى محتكر

كل حاجة شبة احمد عز كدة فى الحديد

كل لاعيب البلد اهلى والدورى قبل حتى ميتلعب معروف

بس الحمد الله ارتحنا من اقرص ياحضرى

يلا ارزاق بقى بس لو الدنيا كلها احمرت

هيفضل قلبى ابيض

اهو هو دة اللى مش ممكن ابدا!

لولا اختلاف الرأى يامحترم

لولاالزلطتين ما الوقود انضرم

لولا فرعين ليف سوا مخاليف

كان بينا حبل الود كيف اتبرم

من هنا ابدا المفوضات بتاعتى انا وماما

من يومين كدة ماما اصدرتلى فرمان قال اية

عايزة تتخلص من ارشيف الدستور اللى عندى تحت السرير

وفى دولابى وحيات ربنا كان هيغمى عليا انا مش عارفة هو عملهم قلق كدة

لييية ديما تقولى انتى عايزة تعملى مزرعة فيران فى الاوضة

من الجرايد والكتب دى اللى هتوديكى فى ستين داهية

وكمان نظرك خلاص قرب يروح من كتر القراية بليل

اصل انتوا متعرفوش بموت فى القراية بليل

يعنى اى حاجة ممنوعة انى اقراهة بحاول فى الليل كدة

اقرها قبل منام

نفسى فى مرة يحسوا بية الدستور دة حياتى وبالذات محبوبتى

الصفحة المجنونة ضربة شمس والله مش عارفة من غيرها كنت هعمل اية

ولا حياتى كانت هتتشقلب للاحسن كدة ازى

مش كدة وبس واللى فارسنى اكتر بقى لما اعلق صورة لجيفارا

يتهمونى بالشيوعية ولما اسمع منير وسيد درويش اخويا يقول علية مجنونة

ولما اقرا حاجة لماركيز يقولى انتى عايزة تعملى فيها مثقفة وخلاص

عايزنى اغير طريقة تفكيرىازاى بعد 21 سنةخلاص بقى زهقت من معملة الاطفال دى

لازم يعرفوا انى كبرت وخلاص لية حياتى الخاصة

المهم وقفت وصممت على رأى وزعقت باعلى صوتى

وقلتلهم اهو هوا دة اللى مشش ممكن ابدا

وانتوا عارفين بقى اية اللى ممكن يحصل فى المواقف دى بس

اهم حاجة انى كسب المعركة ودلوقت مخبياهم بين هدومى فى دولابى

لية برميل فاضى؟

احسن مافيها العشق والمعشقة

وشويتين الضحك والتريقة

شفت الحياة لفيت لقيت الذ تغيرها

ودة يعنى التعب والشقا

ومن هنا ابدا اول تدويناتى بكلام العبقرى صلاح جاهين

مش عارفة اعرف نفسى ازاى بس كلى اللى اعرفة انى

اسمى ايمان داخلة على 22 سنة مؤهل متوسط بعيد عنكوا

من مصر اللى نفسى بجد تبقى ام الدنيا بس عندنا حكومة

عايزة اللى يحكمها

ناس كتير اوى بتقول علية مجنونة مش دة المهم

المهم انى بعمل اللى انا عايزاه ساعات بحس انى فى سجن جونتنامو

وساعات تانية بحس ان الدنيا ملكى

اهلى عندهم احساس انى شبة البرميل الفاضى مليش لازمة

بس انا بحاول اصلح ما افسدتة الايام

حلوة الفصحى دى عندى اصحاب كتير اوى بس ديما وحيدة معرفش لية

يمكن علشان بحب انكد على نفسى كتير بموت فى منير

مش علشان اثبت انى مثقفة لا انا بحبه بجد لقيت نفسى فى اغانية

بحب صلاح جاهين اوى ومثلى الاعلى استاذ ابراهيم عيسى

بحب البحر فى عز الشتا بحس باا لدفا وانا بتمشى علية وباكل ايس كريم

بحب اجرب حاجات كتير مش مهم صح او غلط بس يكفينى شرف التجربة

بحب اجيب كتب من من غير محد يشوفها واقعد بليل كدة استجم معى نفسى

بعمل حاجات كتير من ورا اهلى يمكن علشان لو عرفوا هيزعلو منى ويحرمونى انى اعملها

نفسى اصارحهم بكل حاجة بس بخاف من المواجة

يمكن علشان اتعوت انى اعمل كل حاجة بنفسى من غير ما اخد رايهم

انا عارفة انى مش بعرف ادون بس دة اللى جويا

جوايا حاجات كتير بس مش عارفة اترجمها


واشطاط بقى علشان ماما بتنادى علية